Кыргызстандын улуттук статистика системасына эл аралык баалоо башталды
21-июлда Улуттук статистика комитетинде Кыргызстандын улуттук статистика системасын эл аралык стандарттарга шайкештигин аныктоого багытталган Глобалдык баалоо расмий түрдө башталды. Бул тууралуу комитеттен кабарлашты.
Баалоону БУУнун Европа экономикалык комиссиясынын колдоосу менен түзүлгөн эл аралык эксперттер тобу жүргүзөт. Анын курамына ЕЭК БУУ, ЭСКАТО БУУ, Евростат, Норвегиянын Борбордук статистика бюросу жана Швейцариянын Федералдык статистика башкармалыгынын өкүлдөрү кирди.
Улуттук статистика комитетинин төрагасы Бактыбек Кудайбергенов эксперттер менен жолугушууда акыркы беш жылдагы статистика тармагындагы реформаларды, санариптештирүү иштерин, административдик маалыматтарды кеңири колдонуу жана эл аралык стандарттарды киргизүү боюнча жетишкендиктерди талкуулады.
Глобалдык баалоо 21–28-июль аралыгында өтүп, анын жыйынтыгында Кыргызстандын статистика системасын мындан ары өнүктүрүү боюнча сунуштар даярдалат.
Белгилей кетсек, бул Кыргызстан үчүн үчүнчү Глобалдык баалоо болуп саналат. Буга чейин мындай баалоо 2011 жана 2021-жылдары жүргүзүлгөн.
Миссиянын алкагында эл аралык эксперттер Улутстаткомдун адистери, мамлекеттик органдардын, эл аралык уюмдардын, академиктер коомчулугунун, жалпыга маалымдоо каражаттарынын өкүлдөрү - расмий статистиканын колдонуучулары жана өндүрүүчүлөрү менен бир катар жолугушууларды өткөрүшөт.
