Экологиялык тармактар боюнча социалдык эсептер матрицасы иштелип чыкты
КРнын Улуттук статистика комитетинде Азия өнүктүрүү банкынын эл аралык эксперти Майкл Жон Барсабалдын миссиясы болуп өттү. Анын алкагында экологиялык тармактардын статистикалык эсебин өркүндөтүү жана улуттук эсептер системасын өнүктүрүү маселелери каралды.
Миссиянын негизги максаты - экологиялык тармактар боюнча социалдык эсептер матрицасын иштеп чыгуу, алынган көрсөткүчтөрдү ресурстарды пайдалануу жана “Чыгымдар – чыгарылыш” таблицаларын интеграциялоо, ошондой эле алардын өлкөнүн ички дүң өнүмүнө (ИДП) кошкон салымын аныктоо болуп саналат.
Улуттук статистика комитетинин маалыматына ылайык, акыркы жылдары климаттын өзгөрүшү, жаратылыш ресурстарын сарамжалдуу пайдалануу жана “жашыл” экономикага өтүү маселелери өзгөчө мааниге ээ болуп, бул багыттагы статистикалык көрсөткүчтөрдү өркүндөтүү зарылдыгы күч алды.
2023-жылы статком экологиялык товарларды жана кызматтарды өндүрүүчүлөрдүн, ошондой эле экологиялык тармактардагы иш менен камсыз болуунун тандалма изилдөөсүн жүргүзгөн. Анын жыйынтыктары “жашыл” экономиканы баалоо методологиясын өнүктүрүүгө чыйыр салган.
Ал эми бул жолку миссиянын жүрүшүндө, статкомдун адистери эл аралык эксперт менен биргеликте экологиялык тармактар боюнча социалдык эсептер матрицасын иштеп чыгышты. Бул экологиялык товарлар менен кызмат көрсөтүүлөрдүн экономикалык салымын так баалоого жана тиешелүү маалыматтарды улуттук эсептер системасына киргизүүгө мүмкүнчүлүк бермекчи.
Билдирүүгө караганда, миссиянын жыйынтыктары расмий статистиканын сапатын жогорулатып, “жашыл” экономиканын өнүгүшүн баалоо жана натыйжалуу мамлекеттик чечимдерди кабыл алуу үчүн ишенимдүү маалыматтык базаны кеңейтүүгө жардам берет.
