Кыргызстан Түркиянын жашыл экономикадагы тажрыйбасын үйрөнүүдө
Кыргыз Республикасынын делегациясы Түркия Республикасына болгон окуу сапарынын алкагында жашыл экономика, климаттык каржылоо жана көмүртек чыгарындысын башкаруу боюнча эл аралык тажрыйба менен таанышты. Бул тууралуу Экономика жана коммерция министрлигинен билдиришти.
Тиешелүү мекеменин маалыматына ылайык, 21–23-июль күндөрү өткөн окуу сапарынын жүрүшүндө делегация Түркиянын Жашыл таксономияны өнүктүрүү, жашыл инвестицияларды тартуу, парник газдарын мониторингдөө (MRV) жана чыгарынды квоталары менен соода жүргүзүү системасын (ETS) киргизүү боюнча практикалык тажрыйбасын үйрөндү.
Жолугушууларда туруктуу инвестицияларды өнүктүрүү, климаттык долбоорлорду каржылоо, өнөр жайды декарбонизациялоо жана көмүртек рыногун өнүктүрүү маселелери талкууланды.
Мындан тышкары, делегация Анкара шаарындагы Votorantim Cimentos цемент заводунда болуп, экологиялык стандарттарды сактоо, энергиянын натыйжалуулугун жогорулатуу жана парник газдарынын чыгарындысын азайтуу боюнча колдонулуп жаткан технологиялар менен таанышты.
Маалыматка ылайык, Түркиянын бул багыттагы тажрыйбасы Кыргызстандын Жашыл таксономиясын өнүктүрүүгө, туруктуу каржылоо механизмдерин өркүндөтүүгө жана жашыл долбоорлорду ишке ашырууга көмөк көрсөтөт.
Кыргызстан жашыл экономикага өтүү жана климаттык демилгелерди ишке ашыруу боюнча эл аралык өнөктөштөр менен кызматташууну мындан ары да улантат.
