Кыргызстанда эң жогорку айлык акы кайсы тармакта?
КРнын экономикасында калктын реалдуу кирешелеринин тынымсыз көбөйүшүнүн натыйжасында ички суроо-талаптын өсүшү белгиленүүдө. Экономиканын дээрлик бардык секторлору өлкөнүн реалдуу ИДӨнүн эки орундуу көрсөткүчтөрүн 11,9 % деңгээлинде шарттоо менен оң динамиканы көрсөтүүдө.
Кыргызстанда дээрлик бардык негизги экономикалык тармактарда орточо айлык акы өткөн жылга салыштырмалуу кыйла өстү.
Улуттук статистика комитетинин маалыматына ылайык, 2026-жылдын май айында эң жогорку орточо эмгек акы финансылык ортомчулук жана камсыздандыруу тармагында катталган. Бул тармакта иштеген кызматкерлердин орточо айлыгы 99 миң сомдон ашып, өткөн жылдын ушул мезгилине салыштырмалуу дээрлик 22 миң сомго көбөйгөн.
Экинчи орунда кен казуу тармагы турат. Бул багыттагы кызматкерлердин орточо эмгек акысы бир жыл ичинде 73,5 миң сомдон 101,6 миң сомго чейин жогорулап, өлкөдө 100 миң сомдук чекке жеткен алгачкы тармактардын бири болуп калды.
Алдыңкы бештикке ошондой эле:
- маалымат жана байланыш – 89 миң сом,
- транспорт жана жүк сактоо – 75,6 миң сом,
- кайра иштетүү өнөр жайы – 73,5 миң сом кирди.
Мындан сырткары бир жыл ичиндеги эң олуттуу өсүш социалдык тармактарда байкалган. Айрыкча билим берүү жана саламаттыкты сактоо кызматкерлеринин эмгек акысы 2026-жылдын 26-мартындагы президент Садыр Жапаровдун “эмгек акыны төлөө шарттарын жакшыртуу чаралары жөнүндө” жарлыгынын негизинде орточо эсеп менен эки эсеге көбөйгөн.
Билим берүү тармагында орточо айлык 26,2 миң сомдон 49,3 миң сомго чейин өсүп, дээрлик эки эсеге жакындады. Ал эми саламаттык сактоо жана социалдык тейлөө тармагында эмгек акы 27,1 миң сомдон 53 миң сомго чейин көбөйдү.
Айыл чарба тармагында да оң динамика байкалып, орточо айлык 27,8 миң сомдон 37,2 миң сомго чейин жогорулады, бирок эмгек акысы салыштырмалуу төмөн бойдон калган тармактардын катарында калды. Ошондой эле мейманкана жана ресторан кызматы (40,2 миң сом), искусство, көңүл ачуу жана эс алуу тармагында (44,6 миң сом) айлык акы төмөн бойдон калууда.
Салыштырмалуу таблицада 2025-2026-жылдын май айларындагы эң жогорку айлык акы төлөнгөн тармактар:
|
Тармактар |
2025-жылы |
2026-жылы |
1 жылдык өсүш |
|
Финансылык ортомчу/ камсыздандыруу |
77 145 ⃀ |
99 007 ⃀ |
+28,3% |
|
Пайдалуу кендерди казуу |
73 532 ⃀ |
101 551 ⃀ |
+38,1% |
|
Маалымат жана байланыш |
74 801 ⃀ |
89 065 ⃀ |
+19,1% |
|
Транспорт жана жүк
сактоо |
53 756 ⃀ |
75 645 ⃀ |
+40,7% |
|
Курулуш |
50 407 ⃀ |
65 106 ⃀ |
+29,2% |
|
Билим берүү |
26 235 ⃀ |
49 301 ⃀ |
+87,9% |
|
Саламаттыкты сактоо |
27 150 ⃀ |
53 000 ⃀ |
+95,2% |
Улуттук статистика комитетинин маалыматтары көрсөткөндөй, акыркы бир жыл ичинде дээрлик бардык экономикалык ишмердиктин түрлөрүндө эмгек акы жогорулады.
