Wildberries маселесинен кийин тигүүчүлөргө 5 айлык салык каникулу берилди
Россиядагы Wildberries маркетплейсинин кампаларына жасалган учкучсуз учактардын чабуулдарынан кийин Кыргызстандын тигүү тармагында жаралган кыйынчылыктарга байланыштуу жергиликтүү тигүүчүлөргө 5 айлык салык каникулу берилди.
Маалыматка ылайык, Кыргыз тигүүчүлөр ассоциациясы 18-июлдагы окуядан кийин WhatsApp аркылуу атайын топ түзүп, ага өлкө боюнча миңден ашуун тигүүчүнү бириктирген. Андан соң ишкерлердин көйгөйлөрүн эске алуу өтүнүчү менен Мамлекеттик салык кызматына кайрылуу жөнөтүлгөн.
3-августта 70тен ашуун тигүүчү Мамлекеттик салык кызматынын төрагасынын орун басары Кубанычбек Ысабеков менен жолугушуп, анын жыйынтыгында тигүү тармагына 5 айга чейин салык каникулун берүү чечими кабыл алынганы маалым болду.
Бул тууралуу Кыргыз тигүүчүлөр ассоциациясынын төрайымы Диля Дүйшөбаева социалдык тармактагы баракчасында билдирип, ишкерлердин өтүнүчүнө көңүл буруп, колдоо көрсөткөнү үчүн Мамлекеттик салык кызматына ыраазычылык жарыялады.
Дүйшөбаеванын айтымында, Кыргыз тигүүчүлөр ассоциациясы 18-июлдагы Россиядагы Wildberriesтин кампасына алгачкы жолу дрон чалгыны жасалганда эле ватсаптан группа ачып, 1000ден ашуун жергиликтүү тигүүчүлөрдүн башын бириктиришкен. Алар Салык кызматына ишкерлердин суроосу боюнча кайрылуу жолдоп, салык кызматынын салык төлөмдөрүнө карата каникул беришин өтүнүшкөн.
Эске салсак, июль айынан бери Россиядагы Wildberries маркетплейсинин логистикалык борборлору учкучсуз учактардын чабуулуна бир нече жолу кабылды. Forbes Russia маалыматына ылайык, июль айында компаниянын кампаларынын кеминде 17%ы убактылуу иштен чыгып, сатуучулардын чыгымы болжол менен 280 млрд рублга жеткен. Чабуулдардын кесепетинен кеминде сегиз адам каза болуп, ондогон адамдар жаракат алган. Бул окуялар Wildberries аркылуу товар саткан миңдеген ишкерлерге, анын ичинде кыргызстандык тигүүчүлөргө да таасирин тийгизген.
