Финансы министрлиги Бакай-атадагы социалдык мекемеге колдоо көрсөттү
Финансы министри Руслан Сүйүналиев Талас облусуна болгон иш сапарынын алкагында Бакай-Ата районундагы улгайган адамдар жана ден соолугунун мүмкүнчүлүктөрү чектелген жарандар жашаган социалдык стационардык мекемеге барып, анда жашаган жарандар менен жолугушуп кайтты.
Финансы министрлигинин маалыматына караганда, КРнын Министрлер Кабинетинин тескемесине ылайык, Финансы министрлиги аталган мекемеге камкордук көрсөтүүнү өз милдетине алган. Учурда мекемеде 78 адам жашайт жана анын ичинде 34 аял жана 44 эркек бар.
Ушуга ылайык, жарандардын жашоо шарттарын жакшыртуу үчүн мекемеге жаңы эмеректер жана төшөнчү буюмдар берилди. Алардын арасында 20 функционалдык керебет, 60 ортопедиялык матрас, 60 бир кишилик керебет, 80 тумбочка, 40 шкаф, 40 тамактануучу стол, 80 отургуч жана төшөк жууркандар бар. Мындан тышкары, медициналык жана чарбалык керектелүүчү буюмдар, ошондой эле «Желмаян» жеңил транспорт каражаты сатып алынган.
Министр Руслан Сүйүналиев мекемеде жашаган улгайган адамдарга жана ден соолугунун мүмкүнчүлүктөрү чектелген жарандарга мамлекеттик камкордук мындан ары да улантыларын белгиледи.
Билдирүүгө караганда, көрсөтүлүп жаткан жардам мекеменин материалдык-техникалык базасын чыңдоого жана социалдык кызмат алуучулар үчүн ыңгайлуу шарттарды түзүүгө багытталган.
