Кыргызстан Кытайга “Торугарт” өткөрмө пунктун 24/7 иштетүүнү сунуштады

Кыргызстан «Торугарт» автожол өткөрмө пунктун Кытай тараптан суткасына 24 саат, жумасына 7 күн иштөө режимине өткөрүүнү сунуштады. Бул маселе 7–8-сентябрда Кытайдын Үрүмчү шаарында өткөн Кыргызстандын жана Кытайдын чек ара бажы органдарынын жетекчилеринин жылдык жолугушуусунда талкууланган.

Бул иш-чарага кыргыз тараптан - Мамлекеттик бажы кызматынын, Суу ресурстары, айыл чарба жана кайра иштетүү өнөр жайы министрлигинин өкүлдөрү, ал эми кытай тараптан КЭРнын Башкы бажы башкармалыгынын өкүлдөрү катышышты.

Жолугушууда бажы көзөмөлүнүн натыйжалуулугун жогорулатуу, өткөрүү пункттарынын өткөрүү жөндөмдүүлүгүн кеңейтүү жана эки өлкөнүн тышкы соода байланыштарын өнүктүрүү маселелери каралды.

КРнын Бажы кызматынын маалыматына караганда, маселе айрыкча “Торугарт” жана “Эркештам” өткөрмө пункттарынын иши тууралуу болду. Тараптар өткөрүү пункттарындагы жүктөмдүн жаңы чектик көрсөткүчтөрүн аныктоо жана кезекте турган транспорт каражаттарынын саны боюнча күн сайын маалымат алмашып турууну макулдашты.

Мындан сырткары кыргыз тарап “Торугарттын” өткөрүү жөндөмдүүлүгүн жогорулатуу боюнча жүргүзүлүп жаткан иштер тууралуу маалымат берип, Кытай тараптагы өткөрмө пунктту 24/7 режимине өткөрүүнү сунуштады. Ал эми Кытай тарап бул сунушту Кытайдын тиешелүү мамлекеттик органдарынын кароосуна киргизүүгө даяр экенин билдирди.  

Жолугушууда тараптар Кытай–Кыргызстан–Өзбекстан темир жолунун курулушуна байланыштуу бажылык тариздөө, трансчек аралык контрабандага каршы күрөшүү жана ыкчам маалымат алмашуу маселелерин да талкуулашты.

Жолугушуунун жыйынтыгында 2026-жылга карата чек ара бажы органдарынын жетекчилеринин жолугушуусунун протоколуна кол коюлду. Анда тараптар жетишкен макулдашуулар бекитилди.