Зергерчилик чөйрөсүндө атайын эсепке коюу электрондук форматка өткөрүлдү
Мамлекеттик салык кызматы баалуу металлдар, баалуу таштар жана зергер буюмдары менен иш жүргүзгөн жактарды атайын эсепке коюу жол-жобосун электрондук форматка өткөрдү. Бул тууралуу салык кызматынан кабарлашты.
Билдирүүгө караганда, эми арызды жана зарыл болгон маалыматтарды салык төлөөчүнүн кабинети аркылуу салык органына барбастан, электрондук түрдө тапшырууга болот. Кызматты колдонуучулар арыздын статусун көзөмөлдөп, мамлекеттик кызмат көрсөтүүнүн жыйынтыгын электрондук түрдө ала алышат.
Арыз каралып бүткөндөн кийин атайын эсепке коюу жөнүндө күбөлүк жана атайын эсепке коюу картасы түзүлөт.
Бул жаңылануу кагаз түрүндөгү документ жүгүртүүнү азайтып, колдонуучулардын убактысын үнөмдөөгө, ошондой эле мамлекеттик кызмат көрсөтүүнү алуу процессин ыңгайлуу жана ачык-айкын кылууга шарт түзөт.
Атайын эсепке коюу жол-жобосун санариптештирүү Салык кызматынын баалуу металлдар, баалуу таштар жана зергер буюмдары жаатындагы ишмердүүлүктү мамлекеттик жөнгө салууну модернизациялоо жана автоматташтыруу боюнча жүргүзүп жаткан иштеринин бир бөлүгү болуп саналат.
