Манаста 2 млн долларлык этти кайра иштетүүчү комплекс курулат
Кыргызстанда этти кайра иштетүүнү өнүктүрүүгө багытталган жаңы долбоор колдоого алынды. Россия-Кыргыз өнүктүрүү фонду (РКӨФ) Манас шаарында заманбап эт кайра иштетүү комплексин куруу боюнча “Мираж” ЖЧКсы менен каржылоо келишимине кол койду.
Долбоордун жалпы наркы 2 млн долларды түзөт. Анын ичинен РКӨФ өнөктөш банкы “Бакай Банк” аркылуу 900 миң $ каржылайт. Каражат жаңы өндүрүштү ишке киргизүүгө жана долбоорду ишке ашырууга жумшалат.
Мекеменин маалыматына ылайык, ишкана ишке киргенден кийин Кыргызстандын этти кайра иштетүү рыногунун 10%га чейинки бөлүгүн ээлөөнү көздөйт. Алгач продукция ички рынокко багытталат.
Өндүрүш ишке киргенден кийин 2 жылдан соң продукцияны коңшу өлкөлөргө экспорттоо пландалууда. Комплекс тамак-аш коопсуздугу боюнча эл аралык талаптарга, анын ичинде HACCP жана ISO стандарттарына ылайык иштейт.
Ишкананы 2026-жылы ишке киргизүү пландалууда. Долбоордун алкагында 200гө чейин жаңы жумуш орду түзүлөрү күтүлүүдө.
РКӨФ башкармалыгынын төрагасы Артем Новиковдун айтымында, аймактарда кайра иштетүүчү ишканаларды түзүү жергиликтүү экономиканы өнүктүрүүгө жана өлкөнүн азык-түлүк коопсуздугун бекемдөөгө өбөлгө түзөт.
