Экономика министрлигинин кызматкерлери пландаштыруунун чеберчилигин үйрөнүп жатышат
16–19-сентябрда КРнын Экономика жана коммерция министрлигинде “Өнүгүүнү башкаруу: өсүштүн таяныч чекитинин чебер-планын түзүүгө жетекчилик кылуу” аттуу квалификацияны жогорулатуу курсу өтүүдө. Окутууга мамлекеттик органдардын жана жергиликтүү өз алдынча башкаруу органдарынын өкүлдөрү катышууда.
Курс РФнын Президентинин алдындагы Россиянын Эл чарбасы жана мамлекеттик башкаруу академиясы (РАНХиГС) тарабынан уюштурулган. Сабактарды чебер-пландаштыруу жана аймактык өнүктүрүү жаатындагы россиялык эксперттер Андрей Марголин, Дмитрий Соснин, Александр Холоднов жана Станислав Далидчик өтүүдө.
Катышуучулар чебер-пландаштыруунун заманбап ыкмаларын, аймактарды өнүктүрүүнүн стратегиялык көз карашын жана сценарийлерин калыптандырууну, агломерациялык ыкманы жана Россиянын тажрыйбасын үйрөнүшүүдө. Ошондой эле чебер-пландын негизги натыйжалуулук көрсөткүчтөрүнүн (KPI) системасын, башкаруу алкагын жана долбоорлор портфелин иштеп чыгуу боюнча практикалык топтук тапшырмалар каралган.
Эксперттердин айтымында, чебер-план — бул аймакты өнүктүрүүнүн инструменти гана эмес, шаардык мейкиндикке болгон жаңы мамилени калыптандыруунун, шаардык чөйрөнүн жана тургундардын жашоо сапатын жогорулатуунун жолу болуп саналат.
Окутуу стратегиялык жана аймактык өнүктүрүү жаатындагы адистердин кесиптик компетенцияларын жогорулатууга багытталган.
