Ири инвестициялык долбоорлор үчүн жерди 50 жылга чейин берүү сунушталууда
Жогорку Кеңештин тармактык комитетинде ири инвестициялык долбоорлорду ишке ашыруу үчүн мамлекеттик жана муниципалдык жерлерди берүү тартибин өзгөртүүгө багытталган мыйзам долбоору биринчи окууда каралды. Мыйзам долбоорун бүгүн Жогорку Кеңештин Агрардык саясат, суу ресурстары, жер казынасын пайдалануу, экология жана айлана-чөйрөнү коргоо боюнча комитети талкуулады.
Экономика жана коммерция министринин орун басары Беназир Нурланованын маалыматына караганда, өзгөртүүлөр инвестициялык долбоорлор үчүн жер участокторун берүүнүн укуктук механизмдерин өркүндөтүүгө жана инвесторлордун инвестициялык милдеттенмелерин аткаруусун камсыз кылууга багытталган.
Сунушка ылайык, инвестициялык долбоор үчүн жер алгач 10 жылга чейинки мөөнөткө берилет. Кийин мөөнөт 25 жылга чейин узартылышы мүмкүн. Эгер инвестор инвестициялык келишимдеги милдеттенмелерин талаптагыдай аткарса жана жерди андан ары пайдалануу зарылдыгы болсо, жерди пайдалануунун жалпы мөөнөтү 50 жылга чейин жетиши мүмкүн.
Министрдин орун басары инвестордун жер боюнча милдеттенмелери жана аны кайтарып алуу жол-жоболору инвестициялык келишимде так белгиленерин билдирип, мыйзам долбоору коомдук талкууга атайын портал аркылуу чыгарылганын, бирок сунуштар түшпөгөнүн айтты.
Комитет төрагасы Кубанычбек Самаков мыйзам долбоору коомчулукта кызуу талкуу жаратып жатканын белгилеп, анын ири инвестицияларды тартууга мүмкүнчүлүк түзөрүн, ошол эле учурда долбоордун жоболорун элге туура түшүндүрүү зарылдыгын айтты.
Жыйынтыгында комитет депутаттар тарабынан айтылган сунуштарды эске алуу шарты менен мыйзам долбоорунун концепциясын колдоду.
