Кыргыз Соода-өнөр жай палатасы Шанхайда өкүлчүлүгүн ачты
Кыргыз Соода-өнөр жай палатасы Кытайдын Шанхай шаарында өзүнүн өкүлчүлүгүн ачты. Анын ачылыш аземине Соода-өнөр жай палатасынын президенти Темир Сариев катышты.
Палатанын маалыматына караганда, Шанхайдагы өкүлчүлүктүн ачылышы стратегиялык мааниге ээ. Шаар Кытайдын ири финансылык, технологиялык, өнөр жай жана логистикалык борборлорунун бири болуп саналат. Анда кытайлык жана эл аралык ири компаниялардын штаб-квартиралары жана өкүлчүлүктөрү жайгашкан.
Өкүлчүлүктүн ишинде - Кыргызстан менен Кытайдын ортосундагы сооданы кеңейтүү менен катар биргелешкен өндүрүштөрдү түзүүгө өзгөчө көңүл бурулат.
Буга чейин Соода-өнөр жай палатасынын президенти Темир Сариев Кыргызстанда 100 кыргыз-кытай биргелешкен ишканасын түзүү демилгесин сунуштаган. Шанхайдагы өкүлчүлүктүн ачылышы бул демилгени иш жүзүндө ишке ашырууга багытталган кадам катары каралууда.
"Биздин максатыбыз жөн гана Кытай менен сооданы көбөйтүү эмес. Биз Кытайдын технологиясын, инвестициясын жана өндүрүш тажрыйбасын Кыргызстанга алып келүүнү каалайбыз, ошондо биргелешкен ишканалар, жумуш орундары жана жогорку кошумча нарктагы продукциялар түзүлөт. “100 кыргыз-кытай ишканасын түзүү” демилгеси конкреттүү долбоорлор менен бекемделиши керек", — деди Темир Сариев.
