Таласта жыл башынан бери 139 жумушсуз жаран кесипке акысыз окутулду
Жумушсуз жарандарды иш менен камсыз кылуу жана эмгек рыногунда атаандаштыкка жөндөмдүүлүгүн жогорулатуу максатында кесиптик окутуу иштери жүргүзүлүүдө. Бул тууралуу Талас райондор аралык эмгек, социалдык камсыздоо жана миграция башкармалыгы билдирди.
Маалым болгондой, 2026-жылдын башынан бери башкармалык тарабынан жалпы 139 жаран кыска мөөнөттүү кесиптик окууларга жөнөтүлгөн.
Алар электр-газ менен ширетүүчү, ашпозчу, чач тарач, автоэлектрик, электр монтеру, жыгач уста жана башка эмгек рыногунда суроо-талапка ээ кесиптерге акысыз окутулган.
Окууну аяктаган жарандардын ичинен 61 адам жумуш менен камсыз болгон.
Белгилей кетсек, кесиптик окутуунун негизги максаты - жумушсуз жарандардын кесиптик жөндөмүн өнүктүрүү, эмгек рыногундагы мүмкүнчүлүктөрүн кеңейтүү жана туруктуу жумуш табуусуна көмөктөшүү.
Күндүн негизги жаңылыктары — Telegram каналыбызда
Каналга катталуу
