Орто-Токой ГЭСинин курулушу пландалган тартипте уланууда
Энергетика министринин орун басары Назгүл Үсөнова кайра жаралуучу энергия боюнча адистер менен бирге «Чакан ГЭС» ААКсынын бир катар объектилерин текшерди. Бул тууралуу министрликтин басма сөз кызматынан билдиришти.
Алар Чакан ГЭСтин жана Быстровская ГЭСтин электр кубаттоочу станцияларын, ошондой эле ГЭС-5тин бассейнинде жайгашкан калкып туруучу күн электр станциясын көрүп чыгышты.
Иш сапардын жүрүшүндө делегация Орто-Токой ГЭСинин курулуш аянтчасына барып, иштер бекитилген графикке ылайык жүрүп жатканын, сапат жана коопсуздук талаптары сакталып жатканын көрдү.
Назгүл Үсөнова өлкөдө салттуу жана жаңылануучу энергияны өнүктүрүү, заманбап технологияларды колдонуу жана ресурстарды үнөмдүү пайдалануу – энергетика тармагындагы негизги багыттар экенин белгиледи.
Орто-Токой ГЭСинин пландалган кубаттуулугу – 21 МВт. Долбоор өлкөнүн гидроэнергетикалык потенциалын күчөтүүгө чоң салым кошот.
