Ош шаарында “Кең-Сай” көмөк чордону пайдаланууга берилди
Энергетика министрлиги Ош шаарынын Кең-Сай массивинде жайгашкан “Кең-Сай” көмөк чордонун пайдаланууга берди. Объект пландагы мөөнөтүнөн мурда бүткөрүлдү.
Министрликтин маалыматына ылайык, ачылыш аземине энергетика министри Таалайбек Ибраев, Ош шаарынын мэри Жеңишбек Токторбаев, “Кыргызстан улуттук электр тармагы” ААКсынын башкы директору И.Сыдыгалиев жана жергиликтүү тургундар катышты.
Курулуш иштери “Кыргызстан улуттук электр тармагы” ААК тарабынан аткарылып, долбоорго 18,5 млн сом жумшалды. Жаңы 110/10 кВ “Кең-Сай” көмөк чордону Кең-Сай жаңы конушун, Гулбаар, Кеңеш жана Жапалак айылдарын туруктуу электр энергиясы менен камсыз кылат. Ошондой эле Ош шаарынын 3000 түтүнүн, Араван районунун 1124 гектар жериндеги 6877 тургунга электр берүү мүмкүнчүлүгүн жаратат.
Көмөк чордондун ишке кирүүсү “Учар” жана “Гулбаар” көмөк чордондорунун жүктөмүн азайтып, Ош шаарынын энергетикалык туруктуулугун жогорулатат. Ал жаңы 110 кВ “Узловая–Мангыт” аба чубалгысына туташтырылып, заманбап электр жабдуулары менен камсыздалган.
Бул долбоор Ош шаарынын инфраструктурасын өнүктүрүүгө, жаңы керектөөчүлөрдү улуттук электр тармагына кошууга жана шаардыктардын жашоо сапатын жакшыртууга өбөлгө түзөт.
