Токтогул жана Үч-Коргон ГЭСтеринде реконструкция аяктап, сыноо иштери башталды

Энергетика министри Токтогул жана Үч-Коргон ГЭСтериндеги реконструкцияны текшерди.

Энергетика министри Таалайбек Ибраев Жалал-Абад облусуна болгон жумуш сапарынын алкагыда Токтогул жана Үч-Коргон ГЭСтериндеги гидроагрегаттардын реконструкциясы менен таанышты. Бул тууралуу министрликтин маалымат кызматынан билдиришти.

Токтогул ГЭСинин төртүнчү гидроагрегаты толук калыбына келтирилип, учурда сыноо иштеринин этаптары жүрүп жатат. Реконструкциянын негизги максаты — станциянын иштөө мөөнөтүн узартуу, кубатын 1200 МВттан 1440 МВтка жеткирүү жана заманбап автоматташтырылган башкаруу системасын орнотуу.

Үч-Коргон ГЭСинин экинчи гидроагрегаты да модернизацияланып, кубаттуулукка дагы 9 МВт кошулду. 2026-жылы калган эки гидроагрегат реконструкцияланып, жалпы кубаттуулук 36 МВтка көбөйтүлөт.

Министр ошондой эле жакында ишке берилген 18 МВт кубаттуулуктагы Кара-Көл ГЭСинин учурдагы абалы менен таанышып, станциянын штаттык режимде иштеп жатканын көрдү.