Ат-Башыда электр тармактарынын жаңы имараты ачылды
14-ноябрда, энергетика министри Таалайбек Ибраев Нарын облусунда иш сапар менен болуп, бир катар объектилердин абалы менен таанышып, айрымдарынын ачылыш аземине катышты. Бул тууралуу Энергетика министрлигинин маалымат кызматынан билдиришти.
Иш сапардын алкагында министр Ат-Башы райондук электр тармактарынын жаңы административдик имаратынын ачылыш аземине катышты. Өткөн жылы министрликтин тапшырмасы менен курулушу башталган имарат алты ай ичинде толук бүткөрүлүп, пайдаланууга берилди.
360 м² аянттагы эки кабаттуу имарат 70 кызматкерге ылайыкташтырылып, заманбап шарттар менен жабдылды. Долбоордун наркы 25 млн 326 миң сомду түзүп, каржылоо “Кыргызстан улуттук электр тармагы” ААКтарабынан жүргүзүлдү. Курулуш иштерин “Стрим Групп” ЖЧК аткарды. Мындан сырткары, долбоордо 273 м²кошумча гараж жана чарбалык имарат да каралган.
Министр Ибраев өз сөзүндө жаңы объект аймактагы энергетикалык кызмат көрсөтүүнү жакшыртып, кызматкерлердин иш шартын өстүрөөрүн белгиледи.
“Энергетика тармагындагы реформалардын натыйжасы катары бүгүн Ат-Башыда заманбап имарат ачылып жатат. Бул – калкты сапаттуу тейлөөгө жана кызматкерлер үчүн ыңгайлуу шарт түзүүгө чоң салым. Биздин негизги милдет — калкты кыш мезгилинде үзгүлтүксүз энергия менен камсыз кылуу”, — деди министр.
Иш сапар учурунда министр ошондой эле жакында пайдаланууга берилген Нарын райондук электр тармагынын имаратына да барып, кызматкерлерге түзүлгөн шарттар жана облус боюнча электр керектөө боюнча ыкчам маалыматтар менен таанышты.
