Энергетика министри көмүр кендеринин ишин текшерди

Энергетика министри Таалайбек Ибраев Нарын облусуна болгон иш сапарынын алкагында "Кыргызкөмүр" ААКка караштуу Кара-Кече жана Ак-Улак көмүр кендеринин ишмердүүлүгүн жеринде текшерди. Бул тууралуу министрликтин маалымат кызматынан билдиришти.

Министрдин башкы максаты — социалдык тармактарда тараган “Көмүр жетишсиз” деген маалыматтарды тактоо болгон.

Маалыматка ылайык, 2025-жылдын башынан бери Кара-Кече кесиминен 978 584 тонна көмүр даярдалып, калкка жана Бишкек ЖЭБине жеткирилди. Учурда 255 техника иштеп жатат. Республиканын аймагында 132 отун кампасы ачылып, көмүрдүн баасы 3 290 сомдон 6 800 сомго чейин сатылууда. Эки көмүр иргөөчү станок иштеп жатат.

Ак-Улак көмүр кенинде казылган көмүрдүн 30%ы ЖЭБге жеткирилүүдө, калган бөлүгү калкка жана социалдык объектилерге берилүүдө. Иргөөчү жаңы станок орнотулууда, ишке кирген соң майда көмүр ЖЭБге, кесек көмүр калкка жеткирилет.

Министр көмүр ташуу иштерин үзгүлтүксүз жүргүзүүнү, айдоочуларды күнү-түнү кезек менен иштетүүнү жана калкты арзан көмүр менен камсыз кылууну тапшырды.