Мэрия: Бишкекте электр энергиясын үнөмдөө деңгээли жогорку көрсөткүчкө жетти
Бишкек шаарында электр энергиясын керектөө акыркы күндөрү кыйла азайып, суткалык пайдалануунун көлөмү 9 млн 735 миң кВт саатка чейин түшкөн. Бул тууралуу шаар мэри Айбек Жунушалиев билдирди.
Мэрдин айтымында, шаар үчүн белгиленген суткалык ченем 10 млн 45 миң кВт саатты түзөт. Бирок 13-ноябрга чейин керектөө 11 млн 133 миң кВт саатка чейин өсүп, нормадан ашып келген.
Жунушалиев белгилегендей, тамактануучу жайларда “Тынчтык мыйзамынын” аткарылышын көзөмөлдөөгө багытталган рейддер жана түшүндүрүү иштери керектөөнүн кыйла төмөндөшүнө алып келди.
“13-ноябрда биз тамактануучу жайларда рейд өткөрдүк. Бул иш-чара “Тынчтык мыйзамынын” аткарылышын текшерүүгө багытталган. Түшүндүрүү иштеринен кийин электр энергиясы колдонуу байкаларлык кыскарды. Бүгүнкү күндө бул көрсөткүч суткасына 9 млн 735 миң кВт саатты түзүп, шаар буга чейин болбогон деңгээлге жетти”,- деди мэр.
Ал мындан ары да энергияны үнөмдөөгө көмөк көрсөткөн түшүндүрүү иштерин улантуу зарылдыгын белгиледи. Ошондой эле чоң иш-чараларды кечки 19:00–22:00 аралыгында өткөрүү жана мекеме-ишканалардын жарыкты сарамжалдуу пайдалануу маанилүүлүгүн баса белгиледи.
Мэр райондордун акимдерине да бул багытта ишти күчөтүүнү тапшырды.
