Токтогул жана Үч-Коргон ГЭСтеринде гидроагрегаттар ишке берилди
Энергетика министри Таалайбек Ибраев Жалал-Абад облусуна болгон иш сапарынын алкагында Токтогул ГЭСинин төртүнчү гидроагрегатын жана Үч-Коргон ГЭСинин экинчи гидроагрегатын ишке киргизди. Бул тууралуу Энергетика министрлигинин басма сөз кызматынан билдиришти.
Токтогул ГЭСинин модернизациясы 100% ийгиликтүү аяктап, станциянын жалпы кубаттуулугу 1200 МВттан 1440 МВтка көбөйдү. Ар бир гидроагрегаттын кубаттуулугу 300 МВттан 360 МВтка жогорулады. Модернизациянын максаты – станциянын кубаттуулугун жогорулатуу жана электр энергиясына болгон туруктуу муктаждыкты канааттандыруу.
Үч-Коргон ГЭСинде да экинчи гидроагрегат реконструкциядан ийгиликтүү өтүп, ишке берилди. Бул иштер өлкөдөгү гидроэнергетикалык объектилерди модернизациялоо жана реабилитациялоо программасынын алкагында жүргүзүлүп, энергетика тармагындагы маанилүү кадам катары бааланууда.
