Кыргызстан менен Түркия жашыл энергетика тармагында кызматташат
9-декабрда КРнын энергетика министри Таалайбек Ибраев Түркия Республикасынын Стамбул шаарында Түркиянын энергетика жана жаратылыш ресурстары министри Алпарслан Байрактар менен жолугушту. Бул тууралуу Энергетика министрлигинен билдиришти.
Жолугушуунун алкагында эки тараптуу энергетика кызматташтыгы, ири долбоорлорду ишке ашыруу жана бир катар актуалдуу маселелер талкууланды. Алардын катарында:
- Түрк мамлекеттеринин уюмуна мүчө өлкөлөрдүн ортосунда ишке ашырылуучу “Борбордук Азия-Азербайжан жашыл энергетика коридору (Каспий)” долбоору;
- Кыргызстанда “Технологиялар жана жашыл демилгелер боюнча аймактык борборду түзүү” демилгеси;
- Кубаттуулугу 1305 МВт, жылдык өндүрүшү 3317 млн кВт/саатты түзгөн Казарман ГЭС каскады жана Суусамыр-Көкөмерен ГЭС каскадынын долбоорлору.
Министр Таалайбек Ибраев Кыргызстан энергиянын кайра жаралуучу булактары – гидроэнергетика, күн, шамал жана биоресурстар боюнча зор потенциалга ээ экенин белгиледи. Ошондой эле кыргыз көмүрүнүн жогорку сапаты тууралуу айтып, Түркия менен көмүр тармагында кызматташууга сунушун берди. Түркиялык тарап бул маселе боюнча логистика жагынан пайдалуу болсо кызматташууга даяр экенин билдирди.
Жыйынтыгында тараптар бири-бирине көрсөткөн колдоосу үчүн ыраазычылык билдирип, кызматташтыкты тереңдетүүгө макулдашты.
