Кыргызстанда энергияны сактоо боюнча эл аралык кызматташуу кеңейүүдө
Министрлер Кабинетинин Төрагасынын биринчи орун басары Данияр Амангелдиев Энергетика министрлиги менен үч эл аралык компаниянын ортосунда энергияны топтоо системаларын жыйноо, жеткирүү жана монтаждоо жаатындагы өз ара түшүнүшүү жөнүндө меморандумга кол коюу аземине катышты. Бул тууралуу Өмөттүн басма сөз маалыматынан билдиришти.
Кол коюлган документ энергияны сактоонун заманбап технологияларын иштеп чыгууга жана ишке ашырууга, энергетика системасынын туруктуулугун жогорулатууга, ошондой эле Кыргызстанда кайра жаралуучу энергия булактарына өтүүнү колдоого багытталган.
Белгилей кетсек, бул кызматташуунун алкагында буга чейин пилоттук долбоор ийгиликтүү ишке ашырылган. Тактап айтканда, “Кыргызстан улуттук электр тармагы” ААКнын имаратында 2 саат 15 мүнөт ичинде 100 кВт кубаттуулукту камсыз кылган, 200% кубаттуулуктагы 100 кВт энергия сактоочу блок тесттик режимде орнотулган. Электр энергиясынын булагы катары имараттын чатырына күн батареялары орнотулган.
Меморандумга Кыргыз Республикасынын энергетика министри Таалайбек Ибраев, ошондой эле Amperex Technology Co., Limited (CATL), Xiamen Ampace Technology Limited (Ampace) жана Yangpu Xinchuan Linghang Newenergy Technology Co., Ltd. (YXL) компанияларынын өкүлдөрү кол коюшту.
Аталган компаниялар энергияны топтоо боюнча чечимдердин дүйнөлүк деңгээлдеги өндүрүүчүлөрү жана жеткирүүчүлөрү болуп саналат. Алар ири масштабдагы кайра жаралуучу энергия долбоорлорун ишке ашырууда кеңири тажрыйбага ээ.
Бул меморандум Кыргызстанда заманбап энергия сактоо технологияларын киргизүүгө, энергетикалык коопсуздукту чыңдоого жана «жашыл» экономикага өтүү процессин ылдамдатууга өбөлгө түзөт.
