Өлкөдөгү электр энергиянын 70%ы турак жай секторуна туура келет
Кыргызстанда энергия керектөөнүн болжол менен 70%ы жеке жана турак жай секторуна туура келерин 17-декабрда энергоэффективдүүлүк боюнча өткөн конференцияда ЮНИСОН групп компаниясынын президенти Нурзат Абдырасулова билдирди.
Анын айтымында, Кыргызстанда 1,3 миллиондон ашуун турак жай имараттары бар. Көп батирлүү турак жайлардын түзүмүндө батирлердин 40%ы үч бөлмөлүү, 24%ы эки бөлмөлүү, 10%ы бир бөлмөлүү, ал эми болжол менен 8%ы беш жана андан көп бөлмөлүү батирлерден турат.
Мындан тышкары, өлкөдө 10 миңге жакын коомдук имараттар бар. Аларга билим берүү мекемелери, саламаттык сактоо уюмдары, маданий-көңүл ачуучу жана туристтик объекттер кирет.
"Коомдук имараттар жыл сайын болжол менен 850 миллион киловатт-саат электр энергиясын керектейт, бул өлкөдөгү жалпы энергия керектөөнүн чамасында 10%ын түзөт", — деп кошумчалады ал.
Абдырасулова ошондой эле Кыргызстанда энергоэффективдүүлүк жөнүндө мыйзам кабыл алынганын маалымдады. Бул мыйзам экономиканын бардык тармактарында, анын ичинде отун-энергетикалык ресурстарды казып алуу, өндүрүү, пайдалануу жана керектөө процессинде энергиянын натыйжалуу колдонулушун жогорулатууга багытталган.
"Мыйзамга ылайык, жаңы курулуп жаткан жана реконструкцияланып жаткан имараттар үчүн энергоэффективдүүлүктүн минималдуу талаптары белгиленип, алардын энергетикалык абалын милдеттүү түрдө этап-этабы менен баалоо киргизилет", — деп билдирди ал.
