Президент Кыргызстандагы 100 мегаватт кубаттуулуктагы күн электр станциясын ачты

Бүгүн президент Садыр Жапаров Кемин районунда жайгашкан Кыргызстандагы алгачкы күн электр станциясын ачты.

Электр станциясынын кубаттуулугу 100 МВт түзөт. Ачылыш аземине президент Садыр Жапаров, энергетика министри Таалайбек Ибраев, президенттин иш башкаруучусу Каныбек Туманбаев, инвесторлор жана жергиликтүү тургундар катышты.

Долбоордун инвестору — "Этернал Энергия" ЖЧКсы.

Юстиция министрлигинин маалыматына ылайык, компаниянын жетекчиси Ма Вэньцзюнь болуп саналат. Ал эми негиздөөчүлөрү:

• "Яньань ЦзюЦзю фотоэлектр компаниясы" ЖЧКсы,
• "Чжэшуй Кыргызстан инвестициялык компаниясы",
• "Чжэцзян Цзяннэн Строй".

Компания 2024-жылы түзүлгөн, ал эми 2025-жылдын 27-октябрында кайра каттоодон өткөн.