Нарын облусунун электр энергиясын колдонуу лимити жогорулатылды
Нарын облусунун бийик тоолуу жана климаттык жактан татаал шарттарда жашаган тургундарынын кайрылууларын эске алуу менен электр энергиясын колдонуу эң жогорку чекке жеткен сааттарда керектөө лимитин көбөйтүү чечими кабыл алынганын Энергетика министрлигинин басма сөз кызматы билдирди.
Натыйжада мурда белгиленген лимит 189 648 кВт/сааттан 264 312 кВт/саатка чейин жогорулатылды. Бул электр энергиясын көбүрөөк көлөмдө берүү мүмкүнчүлүгүн түзүп, аймактагы электр камсыздоону турукташтырууга шарт түздү.
Мекеменин маалыматына ылайык, Президенттин Нарын облусундагы ыйгарым укуктуу өкүлчүлүгү райондук мамлекеттик администрациялар, аймактык бөлүмдөр, Энергетика министрлиги жана "Кыргызкөмүр" ААКы менен биргеликте калкты көмүр менен камсыз кылуу боюнча системалуу иштерди жүргүзүүдө.
Мындан тышкары, антимонополиялык органдар менен биргеликте көмүргө болгон баалардын негизсиз өсүшүнө жол бербөө максатында рейддик иш-чаралар уюштурулду. Текшерүүлөрдүн жыйынтыгында баалардын негизсиз жогорулашы боюнча фактылар аныкталган жок.
Жалпысынан Нарын облусунда көмүрдүн баасы 5 500 сомдон ашпайт, ал эми катуу отундун жалпы кору 3 миң тоннадан ашат. Анын ичинен болжол менен 1,5 миң тоннасы "Кыргызкөмүр" ААКынын социалдык отун базаларында топтолгон.
