Аксыда 288 млн сомго насостук станциянын суу түтүктөрү жаңыланууда
Жалал-Абад облусунун Аксы районуна караштуу “Жел-Тийбес” насостук станциясында түтүктөрдү алмаштыруу иштери кызуу жүрүп жатат. Бул түтүктөр 49 жыл мурун орнотулган жана ушул убакка чейин оңдоп-түзөөдөн өткөн эмес. Маселе 2024-жылы өткөн III Элдик Курултайдын делегаттары тарабынан көтөрүлгөн.
Учурда жеринде казуу жана жаңы түтүктөрдү орнотуу иштери жүргүзүлүүдө. Жалпы узундугу 2800 метрди түзгөн түтүктөрдү алмаштыруу 2026-жылдын февраль айында толук аякташы күтүлүүдө. Долбоордун жалпы наркы — 288 млн сом. Жаңы түтүктөр орнотулгандан кийин 3 миң гектар жерге сугат суусун берүү жакшырмакчы.
Белгилей кетсек, 2025-жылга карата III Элдик Курултайдын делегаттарынын сунуштарынын негизинде 410 пункттан турган иш-чаралар планы бекитилген. Анын 12%ы аткарылып, калган 88%ы ишке ашуу стадиясында. Кайрылуулардын көбү ирригация (60%) жана ичүүчү таза суу (23%) маселелерине байланыштуу болуп, бул багыттагы иштер активдүү жүргүзүлүүдө.
