Баткенде Шахимардан ирригациялык системасын жаңылоо иштери башталды
Бүгүн Баткен облусунун Кадамжай районундагы Мухтар Нургазиев атындагы магистралдык каналынын башкы суу алуу курулмасында “мезгил кутучасын” салуу аземи өттү. Бул иш-чара Шахимардан ирригациялык системасын жаңылоо долбоорунун башталышын белгилейт. Бул тууралуу Суу ресурстары, айыл чарба жана кайра иштетүү өнөр жайы министрлигинин басма сөз кызматы билдирди.
Иш-чарага Суу ресурстары, айыл чарба жана кайра иштетүү өнөр жайы министринин орун басары Алмаз Жээналиев, Баткен облусунун ыйгарым укуктуу өкүлү Айбек Шаменов, Дүйнөлүк банктын өкүлү Хью Ридделл, долбоордун жетекчиси Уланбек Торогельдиев жана башка катышуучулар болду.
Долбоор Кадамжай районунун 2 айыл аймагын жана 1 шаарынын аймагын камтып, жалпы 35,2 чакырым канал модернизацияланат. Анын натыйжасында 4435 гектардан ашуун айдоо аянттарынын сугат суу менен камсыздалышы жакшыртылат.
Шахимардан ирригациялык системасын жаңылоо дыйкандарды туруктуу суу менен камсыз кылууга, сугат суунун пайдалануу натыйжалуулугун жогорулатууга жана айыл чарбасын климаттык өзгөрүүлөргө туруктуу кылууга жардам берет.
Иш-чара Суу ресурстары, айыл чарба жана кайра иштетүү өнөр жайы министрлиги тарабынан Дүйнөлүк банктын колдоосу менен “Климаттын өзгөрүүсүнө туруктуу суу чарба кызматтарын жакшыртуу” долбоорунун алкагында жүргүзүлүүдө.
