"Глав Тех Инвест” ЖЧКсына 200 миң сом айып салынып, лицензиясы токтотулду
Курулуш министрлигине караштуу Мамлекеттик архитектура-курулуш контролдоо департаментинин Бишкек шаардык башкармалыгы “Глав Тех Инвест” ЖЧКсына кайрадан административдик чара көрдү. Компаниянын курулуш лицензиясы токтотулду.
Курулуш министрлигинин маалыматына ылайык, 9-декабрда борбор калаанын 10-кичи району, №20а дарегинде аталган компания тарабынан курулуп жаткан 4 кабаттуу соода борборунда коопсуздук техникалык эрежелери бузулуп жаткандыгы тууралуу тургундардан видео-кайрылуу келип түшкөн.
Натыйжада, башкармалык компанияга административдик акт түзүп, 200 000 сом өлчөмүндө айып салган жана жазуу түрүндө эскертүү берген. Кемчиликтер жоюлмайынча курулуш иштери убактылуу токтотулган.
11-декабрда “Глав Тех Инвест” буга чейинки эскертүүлөрдү аткарбагандыгы жана мыйзам бузууларды жойбостон курулушту уланткандыгы үчүн кайрадан протокол түзүлүп, компанияга административдик айып салынган жана лицензиясы токтотулду.
Министрлик бардык курулуш уюмдарына Кыргыз Республикасынын "Шаар куруу жана архитектура жөнүндө" мыйзамынын талаптарын жана курулуштагы коопсуздук техникалык нормаларын так сактоо зарылдыгын эскертет.
