Д.Бекешев мамлекеттик сыйлыктарды ыйгаруу системасын өзгөртүүнү сунуштады
Мамлекеттик сыйлыктарды тапшырууда күтүүсүздүк эффектиси болушу керектигин Дастан Бекешев Жогорку Кеңештин жыйынында "Кыргыз Республикасынын мамлекеттик сыйлыктары, ардак наамдары жана мамлекеттик сыйлыктары жөнүндө" мыйзам долбоорун талкуулоо учурунда билдирди.
"Азыр сыйлык алуучу өзү чуркап, документтерди чогултуп, жамааттын колун топтоп жүрөт. Негизи тескерисинче болушу керек эле. Сыйлык ыйгаруучу орган өзү талапкердин соттолбогонун текшерип, документтерди чогултуп, мамлекеттик сыйлык тапшырууда күтүүсүздүк сакталууга тийиш. Азыр болсо мамлекеттик сыйлык текеберликтин белгисине айланып, адам өзү сыйлыгы үчүн чуркап жүрөт", — деди депутат.
Ал эл өкүлдөрүнө ар кандай наам же сыйлык алууга көмөктөшүү өтүнүчү менен көп кайрылышарын кошумчалады.
"Кээде аксакалдарга “Сизге чын эле керекпи? Ушул ардак грамота же наам менен акылдуураак же кадыр-барктуу болуп каласызбы?” деп айтуудан да уялып кетесиң. Мамлекеттик сыйлыктарды ыйгаруу системасына болгон мамилени сөзсүз өзгөртүү керек", — деп белгиледи Дастан Бекешев.
Өз кезегинде Аяз Баетов көйгөй бар экенин моюнга алып, мамлекеттик сыйлык алуу көптөгөн кагаздарды чогултуу менен коштолгон түйшүккө айланганын айтты. Анын айтымында, мыйзам долбоору кабыл алынса, сыйлыктарды ыйгаруу боюнча комиссия иш тартибин кайра карап чыгууга даяр.
Эскерте кетсек, мыйзам долбоорунда мамлекеттик сыйлыктардын санын 46дан 20га чейин кыскартуу сунушталууда.
