Былтыр дропперлик үчүн 226 адам жоопкерчиликке тартылган
2025-жылы Кыргызстанда дропперлик үчүн 226 адам жоопкерчиликке тартылганын Жогорку Кеңештин финансы, бюджет, ишкердик жана атаандаштыкты өнүктүрүү боюнча комитетинин жыйынында ички иштер министринин орун басары Нурбек Абдиев билдирди.
Анын айтымында, өлкөдө алдамчылык схемаларына катышуунун кесепеттери боюнча түшүндүрүү иштери тынымсыз жүргүзүлүп жатат.
"Биз жарандарды жеке маалыматтарын жана банк карталарын эч кимге бербөөгө дайыма чакырабыз. Анткени бул аракеттердин натыйжасында алдамчылар ири суммадагы каражаттарды жарандардан алдап кетишет. Банкоматтардын жанына чейин эскертүүлөрдү илип жатабыз.
Бирок айрым жаштар, студенттер карталарын сатып жиберген учурлар бар. Ошентсе да күн өткөн сайын мындай фактылар азаюуда, анткени алар жоопкерчиликке тартылышы мүмкүн экенин түшүнө башташты", — деди ал.
Ошондой эле милиция калк арасында маалыматтык-түшүндүрүү иштерин жүргүзүп жатканын кошумчалады.
Эске салсак, 2025-жылы депутаттар Кылмыш Кодексине дропперлик үчүн жоопкерчилик караган өзгөртүүлөрдү киргизүүнү демилгелешкен.
Кодекске жаңы берене киргизилип, банк картасын, виртуалдык актив капчыгын же SIM-картаны үчүнчү жактарга мыйзамсыз аракеттерди жасоо максатында берүү же сатуу ар кандай айып пулдар жана кылмыштын оордугуна жараша мөөнөттөр менен жазаланары белгиленген.
