Президент Москвадагы сүйлөшүүлөргө Алексей Ширшов эмнеге катышканын түшүндүрдү
Президент Садыр Жапаров 23-февралда “Кабар” маалымат агенттигине кезектеги маегинде россиялык ишкер Алексей Ширшовго байланышкан суроолорго жооп берди.
Жогорку Нарын ГЭСтери боюнча биз “жебеген самсага” 37 млн доллар, пайызы менен бүгүнкү күндө 51 млн доллардан ашык акча каражат “Русгидрого” карыз болуп калдык. Бул карыздын пайызы күндөн-күнгө тууп жатат. Эл аралык сот “ушундай пайыз тууйт” деп чечим чыгарып берген экен. “Ошол карыздан кутулуу жолдорун сүйлөшүп келгиле” деп Данияр Амангелдиев баштаган делегацияны Москвага жибергем.
Ал ошол жактан Данияр Амангелдиевге телефон чалып, "Русгидро" боюнча Кыргызстанга пайдалуу маалыматтарым менен бөлүшөм деп сүйлөшүүлөргө кошулуп калыптыр. Себеби илгери ошолор менен иштешип жүргөн да. Көп маалыматтары бар экен. Анын маалыматтары канчалык деңгээлде пайдасы тиет, убакыт көрсөтөт. Эң негизгиси, Ширшовго илгеркидей бир министрликти минип алып башкарганга жол бербейбиз. Мамлекетке пайдасы болсо колдонобуз, жок болсо “тынч жүр” дейбиз. Кыскасы, мамлекеттик казынага кол салууга жол бербейбиз. Ошондуктан, Ширшов менен “манипуляция” кыла бергендерге көңүл бурбаш керек", - деди президент.
