Былтыр диний себептерден улам эмдөөдөн баш тарткандар 43%га төмөндөгөн
Республикалык иммунопрофилактика борбору Кыргызстан мусулмандарынын дин башкармалыгы менен 13 вакцина боюнча фатва чыгаруу маселесин карап жатканын Жогорку Кеңештин Эмгек, саламаттык сактоо, аялдар жана социалдык маселелер боюнча комитетинин жыйынында Саламаттык сактоо министрлигине караштуу борбордун директору Гүлбара Ишенапысова билдирди.
Анын айтымында, эмдөө календарына ылайык, жаңы төрөлгөн ымыркайлар төрөлгөндөн кийинки алгачкы 24 саат ичинде төрөт үйүндө эмделет, андан кийин бир жашка чейин баштапкы деңгээлде эмдөө жүргүзүлөт. "Төрөт үйлөрүндө эмдөө деңгээли 90%дан жогору. Жыл сайын 145 миң бала эмделет. Бирок ошол эле ата-энелер 2,5 айлык жана 5 айлык курагында эмдөөдөн баш тартып жатышат", — деди ал.
Буга чейин Министрлер кабинети, КМДБ жана жергиликтүү бийлик органдары менен биргеликте эмдөөнүн пайдалуулугу боюнча фатва чыгарылып, резолюция кабыл алынган. Эгер мурда диний себептер менен эмдөөдөн баш тарткандар 78%га чейин жетсе, учурда бул көрсөткүч 43%га чейин төмөндөгөн. Бирок жаш ата-энелер арасында социалдык тармактардагы туура эмес маалыматтардан улам эмдөөгө ишенбөөчүлүк 20%дан 40%га чейин өскөн.
Эгер 2024-жылы 19 миң адам эмдөөдөн баш тартса, 2025-жылы алардын саны 15 миңге чейин азайган. Бул имамдар менен даректүү иш алып баруунун натыйжасы экени белгиленди.
Сурамжылоонун жыйынтыгында жаш ата-энелер эмдөө боюнча бир гана жалпы фатва чыкканын, ар бир 13 вакцина боюнча өзүнчө фатва керек экенин айтышкан. Бул багытта КМДБ жана Дин иштери боюнча улуттук комитет менен иш жүргүзүлүүдө.
Фатва — бул муфтий же ислам аалымы тарабынан Куран, сүннөт жана шариаттын негизинде белгилүү бир маселе боюнча берилген диний-укуктук корутунду.
