Мэрия комиссиясы "Бишкек ритуалдык кызматтар агенттиги" ишканасынын мыйзам бузууларын аныктады
Муниципалдык "Бишкек ритуалдык кызматтар агенттиги" ишканасынын ишмердүүлүгүн текшерүү боюнча түзүлгөн жумушчу комиссия Бишкек шаарындагы бир катар көрүстөндөргө инспекциялык текшерүү жүргүзүп, бир катар мыйзам бузууларды аныктады.
Текшерүүгө комиссиянын төрайымы — шаар мэринин орун басары Виктория Мозгачева, ошондой эле Бишкек шаардык кеңешинин депутаттары Таалайбек Дайырбеков жана Жаныбек Асанбеков катышты.
Алгач текшерилген объект — Түштүк-Батыш көрүстөнү болду. Ал 2021-жылдын 1-январынан тартып тиешелүү мамлекеттик кызматтардын корутундусунун негизинде жаңы сөөк коюулар үчүн жабылган.
Карап чыгуу учурунда комиссия аймакты күтүү, сөөк коюу жайларын эсепке алуу жана чарбалык ишмердүүлүктү уюштуруу боюнча бир катар кемчиликтерди аныктады.
Муниципалдык ишканага бардык сөөк коюу жайлары боюнча толук инвентаризация жүргүзүү жана аймакты белгиленген талаптарга ылайык келтирүү боюнча сунуштарды берүү тапшырылды.
Ошондой эле комиссия административдик-аймактык реформанын алкагында шаардын карамагына өткөн Орто-Сай айылынын жанындагы көрүстөнгө жана "Көк-Жар" турак жай конушундагы мусулмандардын көрүстөнүнө барды. Ишкананын жетекчилигине жер тилкелерин пайдаланууну көзөмөлдөөнү күчөтүү, инфраструктураны жакшыртуу жана аймактарды кармоо эрежелерин сактоону камсыз кылуу тапшырылды.
