Дүйнө жүзүндө 473 млн бала согуш аймагында жашап жатат
БУУнун Коопсуздук Кеңеши "Балдар, технологиялар жана жаңжал шартындагы билим берүү" темасында жыйын өткөрдү уюмдун Жаңылыктар кызматы билдирди.
Жыйынды АКШнын биринчи айымы Мелания Трамп ачты. АКШ март айында Коопсуздук Кеңешине ротациялык негизде төрагалык кылып жатат.
Коопсуздук Кеңешинин мүчөлөрүнө кайрылып жатып, БУУнун саясий маселелер боюнча башкы катчысынын орун басары Розмари Дикарло дүйнө жүзүндөгү ар бир бешинчи бала — болжол менен 473 миллион бала — жаңжал аймагында жашап жатканын же согуштан качууга аргасыз болуп жатканын эскертти.
Дикарлонун айтымында, дүйнөдөгү куралдуу жаңжалдардын саны Дүйнөлук экинчи согуш мезгилинен берки эң жогорку деңгээлге жетти. БУУнун маалыматына ылайык, 2023–2024-жылдары балдарга карата катталган оор укук бузуулардын саны 25%га өскөн.
Зордуктоо жана сексуалдык зомбулуктун башка түрлөрү 35%га көбөйгөнү белгиленди.
Мындан тышкары, акыркы күндөрү мектептер Израильде, Бириккен Араб Эмираттарында, Катарда, Бахрейнде жана Оманда аймактагы аскердик операцияларга байланыштуу жабылып, аралыктан окутууга өткөрүлгөнү айтылды. Ошондой эле Минаб шаарындагы башталгыч мектепке жасалган соккудан улам ондогон балдар каза болушу мүмкүн экени тууралуу маалыматтар түшкөн.
