Өспүрүмдөр канча жаштан, кандай иштей алышат?

Эмгек мыйзамдарын көзөмөл кылуу жана текшерүү боюнча кызматынын Эмгек башкармалыгынын жетектөөчү адисинин милдетин аткаруучу Кудурет Жыргалбеков "Биринчи радио" эфиринде 18 жашка чейинки өспүрүмдөрдү ишке орноштуруунун талаптарын түшүндүрдү.

Анын айтымында, Эмгек кодексине ылайык, 14 жаштан тартып өспүрүмдөр ата-энесинин же камкорчусунун уруксаты менен иштей алышат. 14–16 жаштагы өспүрүмдөр үчүн жумуш убактысы кыскартылган — жумасына 24 сааттан ашпоого тийиш. 16–18 жаштагылар үчүн жумасына 36 сааттан ашпаган иш убактысы каралган. 16 жаштан тартып өспүрүмдөр өз алдынча эмгек келишимин түзө алышат.

18 жашка чейинкилер муздак же кооптуу шарттарда ишке кирерден мурда милдеттүү түрдө медициналык кароодон өтүшү керек. Бул чыгымдар иш берүүчүнүн милдетине кирет.

Ошондой эле аларга белгиленген убакыттан ашык иштөө, түнкү нөөмөттө иштөө жана кызматтык иш сапарларга чыгууга тыюу салынат.

Эмгек келишимисиз жана паспортсуз кызматкерди ишке алган учурда айып пул каралган: жеке жактарга — 7,5 миң сом, юридикалык жактарга — 23 миң сом.

Эмгек укуктары бузулган учурда жарандар Эмгек мыйзамдарын көзөмөлдөө жана текшерүү кызматына кайрыла алышат.