Келерки окуу жылына Президенттик "Акылман" лицейине кабыл алуу башталды
2026–2027 окуу жылына Президенттик "Акылман" лицейине кабыл алуу башталганын лицейдин директору Эмил Рыскулов билдирди. Анын айтымында, конкурс Кыргызстандын мектептеринин 6- жана 7-класстын окуучуларынын арасында өткөрүлөт.
"Президенттик лицей 2023-жылдын август айынан бери Чолпон-Ата шаарында иштеп келет. Учурда анда Кыргызстандын бардык региондорунан келген 264 окуучу билим алууда. Окуу акысыз, жатакана бар, күнүнө беш жолу тамак берилет, медициналык кызмат көрсөтүлөт. Булардын баары бекер", — деди Рыскулов.
Ал ошондой эле президенттик лицейдин филиалдары Манас жана Талас шаарларында ачыларын, алар 2026-жылдын күзүнөн тарта иштей баштай турганын билдирди.
"6-класстын окуучулары күзүндө 7-класска өтөт. 6-класстын окуучулары үчүн конкурс бардык үч лицейге кабыл алуу үчүн өткөрүлөт. Ал эми 7-класстын окуучулары Манас жана Талас шаарларындагы лицейлерге кабыл алынат, анткени Чолпон-Атадагы лицейде 8-класс бар", — деп түшүндүрдү Рыскулов.
Конкурска катышууну каалаган талапкер төмөнкү талаптарга жооп бериши керек:
- Учурда Кыргызстандын мектептеринин 6 же 7-класстын окуучусу болуу;
- Кыргыз Республикасынын жараны болуу;
- Жакшы же мыкты окуу көрсөткүчүнө ээ болуу ("ударник" же "отличник").
Конкурстун үч баскычы бар:
1 жана 2-турлар — test.akylman.edu.kg сайтында онлайн-тестирлөө;
3-тур — офлайн-тестирлөө, ал Кыргызстандын ар бир регионунда өткөрүлөт.
1 жана 2-турдагы тесттерде "Математика", "Кыргыз тили", "Орус тили" предметтери боюнча суроолор жана логикалык тапшырмалар камтылган.
3-турдагы тесттерде "Математика", "Кыргыз тили", "Англис тили" предметтери боюнча суроолор жана логикалык тапшырмалар кирет.
