Чаткал районунан 10 мыкты окуучу Кытайга таанышуу сапарына жөнөп кетти

"Кичи-Чаарат" ЖАКы окуучулардын билимге болгон кызыгуусун арттыруу жана дүйнө таанымын кеңейтүү максатында Кытай Эл Республикасына таанышуу сапарын уюштурду. Бул демилге 2025-жылы башталып, быйыл да улантылды. Бул тууралуу "Кичи-Чаарат" ЖАК билдирди.

Маалымдалгандай, 2026-окуу жылынын биринчи чейрегинин жыйынтыгы менен Чаткал районундагы Чакмак-Суу айылынан Ак-Таш айылына чейинки мектептерден окууда өзгөчө жетишкендиктерди көрсөткөн 10 окуучу тандалып алынды. Сапарга ар бир мектептен бирден окуучу катышууда. Аларды райондук мамлекеттик администрациянын өкүлдөрү, мугалим жана "Кичи-Чаарат" ЖАКынын координатору коштоп барышты.

Сапардын жүрүшүндө окуучулар Бээжин, Шанхай жана Үрүмчү шаарлары менен таанышып, Тяньаньмэнь аянтын, Тыюу салынган шаарды, Улуу Кытай дубалын, "Куш уясы»"стадионун жана "Суу кубу" комплексин көрүшөт. Ошондой эле Цинхуа жана Пекин университеттерине, Кытайдын Улуттук алтын казуу корпорациясына барышы пландалган.