Баткендеги Кара-Булак айылында ичүүчү суу системасы жаңыланууда
Баткен районунун Суу-Башы айыл аймагына караштуу Кара-Булак айылында “Климаттын өзгөрүүсүнө туруктуу суу чарба кызматтарын жакшыртуу” долбоорунун алкагында ичүүчү суу системасын куруу иштери активдүү жүрүүдө. Бул тууралуу Айыл чарба министрлигинен билдиришти.
Маалыматка ылайык, айылдагы суу системасы 1950-жылы курулуп, тоо булактарынан өз агымы менен келген суу аркылуу иштеп келген. Бирок 70 жылдан ашуун убакыт ичинде система эскирип, авариялык абалга келген. Натыйжада айылдагы 4 миңге жакын тургун (897 үй-чарба) сапаттуу ичүүчү суу менен камсыз болууда кыйынчылыктарга туш болуп келген.
Учурда Ичүүчү суу менен камсыздоо жана саркынды сууларды чыгарууну өнүктүрүү департаментинин Долбоорлорду ишке ашыруу тобу тарабынан заманбап, коопсуздук талаптарына жооп берген туруктуу суу системасын түзүү иштери жүргүзүлүүдө. Долбоор ар бир үйгө сууну жеткирүүнү көздөп, жергиликтүү калктын жашоо шартын жакшыртууга багытталган.
Курулуш иштерин үстүбүздөгү жылдын жай айларында аяктоо пландалууда. Долбоор ишке ашкандан кийин Кара-Булак айылынын дээрлик 4 миңге жакын тургуну үзгүлтүксүз жана таза ичүүчү суу менен камсыз болот.
Бул өз кезегинде аймактагы санитардык-гигиеналык абалды жакшыртып, жугуштуу оорулардын алдын алууга шарт түзөт.
