Баткенде чек арадан көчүрүлгөн тургундар үчүн жаңы конуштар курулууда

Баткен облусунун башчысы Мамыржан Рахимов Лейлек районундагы Раззаков жана Максат айылдарына көчүрүлгөн тургундар менен жолукту. Бул тууралуу облустук өкүлчүлүктөн билдиришти.

Маалыматка ылайык, чек ара аймактарынан көчүрүлгөн жарандарды турак жай менен камсыздоо максатында Раззаков айылында 60, ал эми Максат айылында 16 үй курулуп, пайдаланууга берилген.

Жолугушуунун жүрүшүндө облус башчысы жаңы конуштардагы инфраструктуралык иштер менен таанышты. Учурда Раззаков айылында сметалык баасы 82 млн сомду түзгөн 75 орундуу бала бакчанын курулушу жүрүп жатат. Ошондой эле сугат суу системасын тартуу иштери жүргүзүлүүдө.

Мындан тышкары, жакынкы убакта айылда фельдшердик-акушердик пункт (ФАП) курулары белгилүү болду. Бул боюнча инвесторлор менен макулдашууга жетишилген. Ошондой эле кичи футбол аянтчасын куруу пландалууда.

Облус жетекчиси мындай иштер аймактагы жашоочулардын жашоо шартын жакшыртууга багытталганын белгиледи.