ММБМАнын төрагасынын мурдагы орун басары Бекзат Абдикахаров жана УКМКнын бир катар кызматкерлери кармалды
Бул тууралуу кечээ Kaktus.media редакциясына күч түзүмдөрүнүн кызматкерлери билдиришкен. Аскер прокуратурасынын кызматкерлери Мамлекеттик мүлктү башкаруу мамагенттигинин(ММБМА) мурдагы төрага орун басары Бекзат Абдикахаровду, УКМКнын Нарын облусундагы башкармалыгынын мурдагы орун басарын жана УКМКнын бир нече бөлүм башчыларын кармашкан.
Алардын арасында кибер алдамчылыкка каршы күрөшүү бөлүмүнүн башчысы, ошондой эле коррупцияга каршы бөлүмдүн мурдагы башчысы бар.
Эске салсак, Бекзат Абдикахаров 2025-жылдын июль айынан тартып ММБМАнын төрага орун басары кызматын ээлеп келген.
Мындан тышкары, 13-апрелде УКМКнын төрагасынын орун басары жана Киберкоопсуздукту камсыздоо боюнча координациялык борбордун директору кызматын аркалаган Даниэль Рысалиев кармалганы белгилүү болгон. Ал “Коррупция” беренеси боюнча шектелүүдө. Ушул эле иш боюнча Ысык-Көл облусундагы 6-башкармалыктын мурдагы башчысы жана УКМКнын борбордук аппаратындагы учурдагы кызматкер да кармалган.
Ошондой эле 14-апрелде УКМКнын мурдагы төрага орун басары Тимур Шабданбеков кармалганы белгилүү болду. Андан тышкары, кызмат абалынан кыянаттык менен пайдаланган деген шек менен дагы алты УКМК кызматкери кармалган.
