Жакынкы Чыгыштагы жаңжалдан улам дүйнөдө 32 млн адам жакырланышы мүмкүн
БУУнун өнүктүрүү программасы жарыялаган баяндамага ылайык, Жакынкы Чыгыштагы аскердик жаңжалдын экономикалык кесепеттеринен улам дүйнө жүзүндө болжол менен 32 млн адам жакырчылыктын чегине түшүп калышы мүмкүн.
Жакынкы Чыгыштагы уланып жаткан аскердик жаңжал 162 өлкөдөгү ондогон миллиондогон адамдарга коркунуч жаратууда. Өзгөчө коркунучта Перс булуңундагы өлкөлөр, Азия, Африка жана чакан арал мамлекеттери турат. БУУнун өнүктүрүү программасы белгилегендей, убактылуу ок атышпоо болгонуна карабастан, жаңжалдын кесепеттери "курч" фазадан "узакка созулган" фазага өтүүдө.
Бул абал канчалык узакка созулса, алсыз өлкөлөрдө жакырчылыктын тез өсүү коркунучу ошончолук жогорулайт — эң жаман сценарийде дагы 32 миллионго жакын адам жакырчылыкка туш болушу мүмкүн.
БУУнун өнүктүрүү программасынын администратору жана БУУнун башкы катчысынын орун басары Александр Де Кро "Согуш — бул өнүгүүнүн артка кетиши. Жаңжал бир нече жуманын ичинде өлкөлөр жылдар бою түзгөн жетишкендиктерди жок кылышы мүмкүн. Биздин талдоо көрсөткөндөй, Жакынкы Чыгыштагы кырдаалдын кесепеттери түздөн-түз жабыркаган өлкөлөр менен эле чектелбейт — ал энергия жана азык-түлүк баасынын өсүшүнө туруштук бере албаган өлкөлөргө катуу сокку урат. Алар бүгүнкү бааларды кармап турууну же эртеңки саламаттык сактоо, билим берүү жана жумуш орундарын каржылоонун ортосунда тандоо жасоого мажбур болушууда. Бул кабыл алынгыс жана муну алдын алууга болот. Эрте чара көрүү абдан маанилүү",-дейт.
Жаңжалдын кесепеттерин жумшартуу үчүн уюм бир катар чараларды сунуштайт. Биринчи кезекте, аз камсыз болгон жана алсыз үй-бүлөлөрдү колдоо үчүн максаттуу жана убактылуу акчалай төлөмдөрдү киргизүү сунушталат. Бул үчүн 6 млрд долларга чейин каражат талап кылынышы мүмкүн.
Ошондой эле электр энергиясы жана тамак-аш даярдоого керектелген газ үчүн убактылуу субсидиялар же ваучерлерди берүү сунушталат.
