Кыргызстанда Чоңдорго билим берүү күнү белгиленди
Бүгүн, 17-апрелде Чоңдорго билим берүү күнү Жогорку Кеңеште белгиленди. Жогорку Кеңештин Басма сөз кызматынын билдирүүсүнө караганда, 17-апрелди Чоңдорго билим берүү күнү катары ар жылы белгилөө боюнча Жогорку Кеңештин тийиштүү токтому былтыр кабыл алынган.
Депутат Медер Чотоновнун жетекчилиги астында өткөн ишчарага Министрлер кабинетинин өкүлдөрү, Германиянын Кыргызстандагы элчиси Моника Ленхард, DVV International жана Чоңдорду окутуу Кыргыз ассоциациясынын өкүлдөрү, билим берүү тармагынын эксперттери катышты.
Жыйында Медер Чотонов маалыматтык технологиялар тездик менен өнүгүп жаткан шартта чоңдордун билим алуусу жана кесиптик квалификациясын жогорулатуусу, жарандардын жаш курагына карабастан жумушка орношуусунун маанилүүлүгүн белгиледи.
“Кылым- жаша, кылым- оку дегендей, билим алуу эч качан кеч эмес. Ар бир жарандын тынымсыз окуп, өзүн өстүрүүсү мамлекетибиздин өнүгүүсү үчүн чоң ролду ойнойт”, - деп белгиледи депутат Медер Чотонов.
Катышуучулар заман талабына жооп берген адистерди даярдоо, чоңдор үчүн билим берүүнүн жеткиликтүүлүгүн кеңейтүү жана өмүр бою билим алуу принциптерин жайылтуу маселелерин талкуулашты.
Иш-чаранын жыйынтыгында бул тармакты өнүктүрүүгө салым кошкон жарандарга Жогорку Кеңештин ыраазычылык каттары жана ар кандай сыйлыктар тапшырылды.
