Кипр ЖОЖдорунда окуу үчүн кыргызстандыктарга 21 стипендия бөлүндү
Кыргызстандыктарга 2026–2027-окуу жылына Кипр университеттеринде окуу үчүн стипендиялар берилгенин Илим, жогорку билим берүү жана инновациялар министрлиги билдирди.
Кипрдин жогорку окуу жайлары жалпы 21 стипендия бөлгөн, анын ичинде:
- 13 стипендия бакалавриат программалары үчүн;
- 8 стипендия магистратура программалары үчүн.
Ошондой эле 5 стипендия окуу акысын толугу менен жабууну карайт.
Стипендиялык программалар төмөнкү багыттарды камтыйт: инженердик жана техникалык адистиктер, бизнес жана башкаруу, маалыматтык технологиялар, гуманитардык жана социалдык илимдер, ошондой эле дизайн жана архитектура.
Мүмкүнчүлүктөрдүн арасында:
- окуу акысын толук же жарым-жартылай жаба турган бакалавриат программалары;
- энергетика, мунай-газ инженериясы жана бизнес-администрлөө багытындагы магистратура программалары;
- кошумча гранттар, анын ичинде "Француз тилин чет тили катары окутуу" программасы боюнча 1500 евро өлчөмүндөгү стипендия бар.
Талапкерлерди тандоодо негизги көңүл академиялык жетишкендиктерге бурулат: орточо баллынын жогору болушу (GPA), тандалган программанын талаптарына шайкештик, айрым учурларда эл аралык сертификаттардын (SAT, ACT, IELTS ж.б.) жана кесиптик тажрыйбанын болушу эске алынат.
Арыз берүү мөөнөттөрү жана катышуу шарттары ар бир университет жана программа тарабынан өз алдынча аныкталат. Ошондуктан кызыккан талапкерлерге тиешелүү жогорку окуу жайларга түз кайрылып, документ тапшыруу тартиби жана мөөнөттөрү тууралуу так маалымат алуу сунушталат.
