Таласта 12 гектар айдоо аянтын сел жууп кетти
Талас районунда нөшөрлүү жамгырдан улам сел жүрүп, айдоо жерлер жабыркады. Бул тууралуу ӨКМдин Талас облусу боюнча башкармалыгынан кабарлашты.
Маалыматка ылайык, сел Талас районуна караштуу Арашан айылында, болжол менен 4-майда саат 19:00 чамаларында катталган.
Нөшөрлүү жамгырдын кесепетинен Арашан айылынын түштүк-чыгыш тарабындагы кокту-колоттордон сел суулары түшкөн. Натыйжада арыктарга суу батпай, айдоо талааларын каптаган.
Маалыматка караганда, болжол менен 12 гектар аянттагы чөп жана арпа талааларын сел суулары жууп кеткен. Турак үйлөргө зыян келтирилген эмес.
Учурда тиешелүү кызматтар тарабынан жеринде тактоо иштери жүрүүдө. Мындан тышкары, селдин кесепеттерин жоюу, арыктарды тазалоо жана суунун агымын жөнгө салуу боюнча иштер жүрүүдө.
