Кара-Сууда селди алдын алуу үчүн каналдар, арыктар тазаланууда
Жетекчиликтин тапшырмасына ылайык, жаз мезгилинде жаан-чачындын көбөйүшүнө байланыштуу сел коркунучун алдын алуу максатында Кара-Суу районунун аймагында ыкчам жана пландуу иштер жүргүзүлүүдө. Бул тууралуу президенттин Ош облусундагы өкүлчүлүгүнөн билдиришти.
Маалыматка ылайык, буга чейин жааган жаан-чачындан улам сел жүрүүчү кооптуу аймактар аныкталып, атайын техникалар тартылып, каналдар, ички чарба арыктары жана сел нугун буруучу жолдор тазаланып, калыбына келтирилүүдө. Ошондой эле сел өтүүчү аймактар бекемделип, тиешелүү алдын алуу чаралары көрүлүүдө.
Аталган иштер калктын коопсуздугун камсыз кылуу, турак жайларды жана инфраструктураны коргоо максатында жүргүзүлүүдө.
Учурда тиешелүү кызматтар күчөтүлгөн тартипте иш алып барып, алдын алуу чаралары үзгүлтүксүз улантылууда.
