Дүйнөлүк банк жана SECO Кыргызстандагы инвестициялык реформаларды колдойт
Инвестициялар боюнча улуттук агенттиктин башчысынын орун басары Мээримбек Койчуманов Швейцариянын Экономикалык маселелер боюнча мамлекеттик катчылыгынын (SECO) өкүлдөрү жана Дүйнөлүк банктын тобу менен жолугушуу өткөрдү.
Агенттиктин маалыматына ылайык, жолугушууда Кыргызстандын инвестициялык саясатынын учурдагы багыттары жана инвестициялык климатты жакшыртуу боюнча чаралар талкууланды. Тараптар өлкөнүн чет өлкөлүк жана ички инвесторлор үчүн жагымдуулугун жогорулатуу маселелерине өзгөчө көңүл бурушту.
Ошондой эле 2026-2030-жылдарга карата инвестициялык саясатты өнүктүрүү стратегиясы каралып, анын негизги артыкчылыктуу багыттары жана инвестиция тартуу механизмдери талкууланды.
Мындан тышкары, экономиканын артыкчылыктуу тармактарын өнүктүрүүгө багытталган биргелешкен долбоорлорду ишке ашыруу маселелери көтөрүлдү.
Жолугушуунун жыйынтыгында Улуттук агенттиктин кызматкерлери үчүн тренингдерди уюштуруу, окутуу курстарын өткөрүү жана инвестициялар тармагындагы мыйзамдык базаны жакшыртуу боюнча консультациялык жана техникалык жардам көрсөтүү тууралуу макулдашуулар жетишилди.
