Азык-түлүк программасы аркылуу Кыргызстанга 910 тонна азык-түлүк алынып келинди
Эмгек, социалдык камсыздоо жана миграция министрлиги өлкө боюнча аялуу үй-бүлөлөрдү колдоо максатында Россия Федерациясы тарабынан Бириккен Улуттар Уюмунун Дүйнөлүк азык-түлүк программасы аркылуу берилген азык-түлүк жардамы келип түшкөнүн маалымдайт.
Маалыматка ылайык, Министрлер Кабинети менен Бириккен Улуттар Уюмунун Дүйнөлүк азык-түлүк программасынын ортосундагы “ Эмгекке, окууга азык-түлүк” долбоорун ишке ашыруу боюнча өз ара түшүнүшүү жөнүндө меморандумдун алкагында көрсөтүлүүдө.
Долбоорлордун катышуучулары ирригациялык системаларды жана ичүүчү суу менен камсыздоо тармактарын калыбына келтирүү, дарыя жээктерин бекемдөө, ошондой эле климаттык тобокелдиктерди азайтуу жана жердин деградациясын алдын алуу үчүн бак-дарактарды отургузуу иштерине катышууда. Бул долбоорлор алыскы жамааттардагы инфраструктураны жакшыртып, табигый кырсыктарга жана климаттык тобокелдиктерге даярдыкты күчөтүү менен катар, жумуш менен камсыз болууга жана өз алдынча эмгектенүүгө кошумча мүмкүнчүлүктөрдү түзөт.
Министрликтин Бишкек жана Ош шаарларындагы кампаларына буга чейин 910 тонна азык-түлүк жеткирилди. Жакынкы күндөрү кошумча түрдө 120 тонна өсүмдүк майынын келиши күтүлүүдө.
