Жети-Өгүздө 110 млн сомго бала бакча курулууда
Ысык-Көл облусунун Жети-Өгүз районундагы Ырдык айылында 140 орундуу заманбап бала бакчанын курулушу уланууда. Бул тууралуу Курулуш министрлигини басма сөз кызматы билдирди.
Маалыматка ылайык, объект республикалык бюджеттин эсебинен каржыланып, жалпы наркы 110 миллион сомду түзөт. Долбоор Турак жай-жарандык курулуш департаменти тарабынан ишке ашырылууда.
Башкы планга ылайык, жалпы аянты 1268 чарчы метрди түзгөн эки кабаттуу, 3 блоктон турган имарат курулууда. Учурда курулуш иштеринин 46 пайызы аткарылып, ички курулуш-монтаждоо иштерин баштоо алдында турат.
Жаңы бала бакчада балдардын тарбиялык сабак өтүүчү, уктоочу жана дарыгердин бөлмөлөрү заманбап шартта жабдылат. Ошондой эле азык-түлүк сактоочу кампасы, ашкана, оюн бөлмөлөрү жана музыкалык-гимнастикалык сабактар өтүүчү залдар каралган.
Долбоор аймактагы социалдык инфратүзүмдү жакшыртууга жана бөбөктөр үчүн ыңгайлуу шарттарды түзүүгө багытталган.
