“Беш-Бурхан” кенинен 900 миң тоннага чейин көмүр казып алуу пландалууда
Энергетика министри Таалайбек Ибраев Ош облусунун Ноокат районунда жайгашкан “Беш-Бурхан” көмүр шахтасына барып, өндүрүштүк иштердин жүрүшү менен жеринде таанышты. Бул тууралуу Энергетика министрлигинин басма сөз кызматы билдирди.
Маалыматка ылайык, иш сапардын алкагында министр шахтанын өндүрүштүк кубаттуулугу, көмүр казуу процесси, коопсуздук чаралары, жер астындагы тоо-кен иштери жана өндүрүш инфраструктурасынын абалы боюнча маалымат алды. Ошондой эле көмүр өндүрүүнүн көлөмүн көбөйтүү, жаңы жумуш орундарын түзүү жана аймактын өнөр жай потенциалын кеңейтүү маселелери талкууланды.
Кен Ош облусунун Ноокат районунда жайгашып, жалпы 317,2 гектар аянтты камтыйт. Анын ичинен 7 гектар жер өндүрүштүк аянтча катары бөлүнгөн. Геологиялык маалыматтарга ылайык, кендин жалпы көмүр запасы 42,225 миллион тоннаны түзөт.
Долбоорду ишке ашырууга байланыштуу бардык чыгымдар инвестор тарабынан каржыланып, баштапкы этапта 25 миллион доллар өлчөмүндө инвестиция тартылган. Бул каражаттар шахтанын инфраструктурасын түзүүгө, жер астындагы өндүрүш иштерин жүргүзүүгө жана заманбап техникаларды тартууга багытталган.
Техникалык долбоорго ылайык, келечекте жылына 900 миң тоннага чейин көмүр казып алуу пландалууда. Долбоор ишке толук кубаттуулукта киргенден кийин жергиликтүү тургундар үчүн 80 жаңы жумуш орду түзүлөт.
