Кыргызстанда дары өсүмдүктөрүн өстүрүү тартиби мыйзамдаштырылды
Президент Садыр Жапаров "Кыргыз Республикасынын айрым мыйзам актыларына өзгөртүүлөрдү киргизүү жөнүндө" мыйзамга кол койду. Документ 2026-жылдын 15-апрелинде Жогорку Кеңеш тарабынан кабыл алынган.
Мыйзамдын негизги максаты — Кыргызстанда дары өсүмдүктөрүн өндүрүү, кайра иштетүү жана туруктуу пайдалануу үчүн укуктук негиз түзүү.
Жаңы өзгөртүүлөргө ылайык, эми жеке жана юридикалык жактар валериана, шалфей, шафран, ферула, кызгылт родиола, мыя, чычырканак, ромашка, лаванда жана башка дары өсүмдүктөрүн айыл чарба ыкмасы менен өстүрүүгө мыйзамдуу укук алышат.
Мыйзамда айрым чектөөлөр дагы каралган. Тактап айтканда, аконит өсүмдүгүн турак жайларга жана социалдык объекттерге жакын аймактарда өстүрүүгө тыюу салынат.
Ошондой эле жапайы дары өсүмдүктөрүн айыл чарба шартында өстүрүүгө уруксат берилип, өсүмдүктөр дүйнөсүнүн мындай объекттерин пайдалануу үчүн акы алынбай турганы белгиленди.
Мындан тышкары, мыйзам менен айыл чарба тармагына инновациялык технологияларды киргизүү, жаңы сортторду жана гибриддерди чыгаруу, дары өсүмдүктөрүн селекциялык-генетикалык ыкмалар менен өстүрүү маселелери да камтылган.
Документте мамлекеттик колдоонун негизги багыттарынын бири катары үрөн чарбасын өнүктүрүү жана дары өсүмдүктөрүн өстүрүү көрсөтүлгөн.
